إهداء إلى الأستاذ الشاعر والقاص أبو العنين شرف الدين بمناسبة تكريمه
إهداء : إبراهيم رضوان
الشعر جوه قلبك .. عمره ما كان "ترف"
إحساسك هو حبك .. والعمر اللى انصرف
ماشى يا شعر جنبك .. أبو العنين شرف !!
...........................................................
إهداء : شعر : وهبة شتيوى
يا حاج سيد كلامى .. مهما أسنفر فيه
أنا نفسى يطلع كلام .. من كل قلبى اهديه
لكنى عاجز ومش قادر أوفى الدين
منين أجيب الكلام يوفيك يا شرف الدين
ومهما أسهر وافكر .. برضه مش هلاقيه
...........................................................
شعر : إسماعيل علام
يا للعجب !!
سن القلم ضحكتك ..
ومال القلب يرقص م الطرب
والكلمة لبست تاج ياقوت
اتمخطرت ...
على صفحه من فضه ودهب
نزغت آهاتى م السكوت
اتعطرت ..
لزقت فى قلبى بالغرة
اتمسمرت ..
.......
تدخل محله يقابلك النغم الجميل
بتردده العِدة
مع الجدران
وألواح الخشب
....
بينى وبينكم عقلى شت
سألت طب إيه السبب
جات الإجابه من السحب
ليه العجب ؟
فنان .. وعرف سكته
راهب فى محراب الأدب
دقق كويش فى الكتاب
دا أبو العنين .. إللى كتب !!
...............................................................
إهداء إلى الأديب الكبير الشاعر الصحفى أبو العنين شرف الدين بمناسبة مناقشة مجموعته القصصية "دائرة الجاذبية"
شعر : سعد أحمد زغلول
مابين سطور الكتب .. فتشت انا عنك
عاشق فنون الأدب .. على كل لون فتك
سألت همس الندى .. قال النسيم : إنك ..
فنان بتسق الأدب .. أجمل حروف منك !
....
غواص فى بحر الأدب .. لك كل يوم صفحات
نهر "العروبة" انسكب .. فيه سلسبيل مقالات
تروى نفوس تلتقى .. فيه شعر وثقافه
وصحافه منك عجب .. تروى التاريخ حكايات
جذبتينى لدايرتك .. والقلب ليك انجذب
عجبى على قصتك .. والصورة فيها العجب
وشربت من ميتك .. شاى الغيطان ع الحطب
حسيت بليل الألم .. وزعقت يابه عزب !
....
وركبت قطر الأمل ... ماشى ف طريق مجهول
فى الزحمه إيه العمل .. والصوره موش مغقول
من بعد طول السفر .. والقلب كان له ميعاد
لما العبير انتشر .. مدت إيديها سعاد
القلب داب م الهوى .. صبح فؤاد مشغول
ومحطه بعد النوى .. مكتوب عليها وصول !!
...
فانتازيا فى المركبه .. غنوه فى حضن النيل
والليل فى نور القمر .. مجاديف تقول مواويل
والعودخ حلم الصفا .. توبه وإيمان بالله
وف واحة المغفرة .. تجرى الدموع وتسيل
...
يا ذكريات انطوت .. جوه القلوب صفحات
سهره سعيده ارتوت .. بالحب والنغمات
لأبو العنين عمنا .. نسجت شعرى وجيت
والحب من ربنا .. بين الصفوف ودعيت
والبركه من جمعنا .. فى الصوره والكلاكيت !!
